Ibrahim Abdel Fattah Mohamed Personal bLOG

لو كنت متابع لقرارات رئاسة الوزراء اللي صدرت إمبارح عن الإجتماع الخامس عشر لرئاسة الوزراء هتلاقي من ضمن القرارات القرار رقم أربعة اللي بينص على:

فى مجال توفير ادوات نظم قواعد البيانات والبرمجيات تم الموافقة على التعاقد مع شركة ميكروسوفت لشراء الرخص الخاصة بالحاسبات المكتبية و الخوادم المستخدمة فى الحكومة، شاملة صيانة وتحديث البرامج طبقا لجدول اعداد الرخص وذلك بقيمة 43.762.321 دولار و 23 سنت ( ثلاثة واربعون مليون وسبعمائة واثنان وستون الف وثلاثمائة وواحد وعشرون دولار وثلاثة وعشرون سنت) على ان يتم الدفع خلال مدة اربع سنوات مالية طبقا لما ورد بالعرض مع الاستفادة بنسبة 10% من عائد الاستثمار يتم تقديمها فى صورة خدمات وتنفيذ مشروعات من خلال الشركات الوطنية تحت اشراف وزارة الاتصالات وتكنولوجيا المعلومات.

بحسبة صغيرة كده هتلاقي إن الرقم ده بالمصري هيساوي: 262,573,926 جنيه وال 23 سنت هيبقى جنيه و38 قرش..مأئتان وإثنان وستون مليون وخمسمائة ثلاثة وسبعون ألف وتسعمائة سبعة وعشرون جنيه وثلاثة وثمانون قرش.

السؤال بقى: لو في حل هيوفر 9/10 من المبلغ ده؟ بس ممكن ياخد وقت دلوقتي بس هيوفر قدام وقت كتييييييييييييييييييييير وفلوس أكتر مش اﻷولى إن الحكومة تستخدم الحل ده؟! أنا عندي الحل ده أنا وشباب تانية كتير في البلد إعترفوا بمبدأ البرمجيات مفتوحة المصدر أو الـ Open Source Software.

البرمجيات مفتوحة المصدر هي: هي البرمجيات التي يمكن الإطلاع والتعديل على شفرتها البرمجية وهى أكثر مرونه للمستخدم من البرامج الأخرى التي لا تتيح مرونه للمستخدم ولا يستطيع التعديل عليها والتي يسميها البعض بالبرمجيات الاحتكارية.

ما علينا من كل ده بس اﻷهم إن البرامج مفتوحة المصدربتكون في الغالب مجانية  وقد تكون بمقابل مادي في بعض الأحيان وفي أغلب اﻷحيان بيكون المقابل المادي ده علشان الدعم مش كثمن للبرنامج.

من أكبر اﻷمثلة على البرامج دي اللينكس اللي ممكن يستخدم مكان الويندوز كبيئة عمل بشكل يومي أو كخادم.

الحل:

1. تعيين كوادر محترفة وشبه محترفة في قسم يكون موجود في كل وزارة يسمى قسم الدعم الفني.
2. يتم الإستثمار في هؤلاء الكوادر بتدريبهم تدريب قوي يأهلهم لإنهم يقوموا بعملية الدعم اللي ممكن تكون مكلفة مع إنها مش مكلفة قوي يعني – مع ملحوظة بس: ده إذا مكانوش قادرين على ده من قبل التدريب وأنا شخصيا أعرف ناس قادرة على ده من أولى وثانية جامعة -.
3. عمل نقل جزئي تصاعدي لكل لبرامج مغلقة المصدرإلى برامج مفتوحة المصدر – يعني ننقل الناس واحدة واحدة مش مرة واحدة من الآخر -.
4. البدء في تشغيل الكوادر إياهم في معامل بحث وتطوير تابعة للحكومة وطلب أبحاث قيمة منهم كل فترة علشان ميتركنوش.

وبكده هنوفر كتير قوي..بس اللي يسمع! لو حابب وعجبك الكلام إنشره يمكن اللي فوق يسمعوا!

تحديث 1: في وقفة صامتة أمام مجلس الوزراء بخصوص القرار ده