Ibrahim Abdel Fattah Mohamed Personal bLOG

بفكر أشتري بسكلته!

أشباح..اللي لسه بيبصوا على الموقع أشباح ولو إنت كنت إنسان بجد و لسه بتيجي هنا..من كل قلبي بشكرك وده لأني مبكتبش بقالي فترة بس عندي إستعداد كبير للكتابة في الفترة اللي جاية..المهم..أنا بفكر أشتري بسكلته..مش بسكلته من بتاعة زمان..بس عجلة..دراجة..للي يعرف منكم أنا مستقر في القاهرة في الفترة دي بسبب شغلي وشغل إيمان..وكنت دايماً بسمع عن الزحمة في القاهرة وانا برده مش متخيل قوي الموقف لحد ماتصدمت بنفسي..

واللي زاد وغطى بقى موضوع الإعتصامات الفئوية ده..مثلاً من إسبوعين كده سواقين النقل الثقيل كانوا عاملين إعتصام في طريق النصر اللي هو الأوتوستراد للي مش واخد باله. وده كان عامل مشكلة كبيرة جداً مش ليا لوحدي إنما لكل الشعب اللي بيستخدم طريق النصر في حياتهم اليومية. خرجت من مكان شغلي وأنا مروح وأبتديت أشق طريقي للبيت لحد ماوصلت لقبل المنصة ولقيت الدنيا واقفة تماماً..قلت طيب انا أنزل اتمشى لحد البيت مش مسافة بعيدة يعني. لقيت السائقين قاعدين جمب سور قاعة المؤتمرات وجايبين شيشة ,ومقطعين من الشجر اللي عند السور ومولعين فيه لزوم المزاج والشاي طبعاً وولا في دماغ أي شخص منهم إن في ناس متعطلة على شان خاطر اللي هما عاملينه.

من يومها وأنا قررت أعمل حاجتين..واحد: إني أعمل مظاهرة فئوية مع الناس اللي زيي اللي متضررة من المظاهرات الفئوية..إثنين: إني أشتري عجلة..ودي فعلاً الفكرة المسيطرة على دماغي في الفترة دي..واللي مليانة كتير من المميزات لو فكرنا فيها شوية..

1. هخف مكان في المواصلات اللي شبه علب التونة في القاهرة..ولو إنت عملت زيي هنخف ييجي مكانين تلاتة كده كمان
2. لو إنت عندك عربية وبرده بتعاني من الزحمة..وقررت تجيب عجلة إنت كمان..يبقى إنت وفرت مكان عربيتك اللي ماشية في الشارع اللي برده شبه علبة التونة بس كبيرة شوية..
3. مش محتاج ولا بنزين ولا سولار فامفيش أزمة هتأثر معاك بقى ولا الكلام الفارغ ده
4. رياضة
5. لو حبيت تمشي فوق الرصيف هتمشي
6. مش هتتأثر بإختناقات المرور قوي..ده إنت معاك عجلة
7. قطع الغيار مش مشكلة كبيرة قوي ومش غالية كمان

فكر بقى في كل ده..ولو إنت عندك ميزة كمان..قول هنا يمكن نقنع الناس إنها تبقى زي هولندا مثلاً والدول اللي الدراجات هي وسيلة المواصلات الأساسية وأرجوك لو عندك أي نصيحة ليا قبل ماشتري ده شاركني بيها.