Ibrahim Abdel Fattah Mohamed Personal bLOG

A story with a Taxi driver

هتكلم بالعربي مع إني عارف إني على بال ما أخلص هيكون جرالي حاجة..المهم من كام يوم كنت بعمل حاجة إسمها فيش أول على شان الجيش..أول يوم رحت القسم إللي أنا تابع ليه (قسم أول) قلتلهم يا جماعة أنا عايز أعمل فيش أول, لقيت الراجل المسئول عن الموضوع ده بيقوللي “أنا ورق الفيش إللي عندي خلص” طبعاَ مفهمتش, فا قلتله “إزاي حضرتك؟, هو مش ده قسم شرطة بردة؟ إزاي يخلص؟” قاللي “هو أنا بيجيلي كمية معينة و بتخلص,لو عايز روح هات من مركز طلخا القديم أو من قسم ثانِ” فسألته سؤال بديهي “و أنا إيه اللي ضمّني إني أروح الاقي هناك؟” فرد علية بإجابة بديهية بردة و قاللي “مفيش حاجة تضمن ده” قلتله “طيب أنا آجي إمتى على شان ألاقي معاك؟” قللي “على 8:30 9:00 كددة” مع العلم إني كنت رايح على 11:00 بس قلت ماشي و مشيت, قمت تاني يوم بدري و قلت نجرب..

وصلت القسم على 9:30و بسأل نفس الراجل “عايز أعمل فيش أول حضرتك” و هو متضايق قاللي..”مفيش ورق,خلص” قلتله “نعم؟ إزاي محضرتك قلت على 9:00,و دلوقتي 9:30,لحق؟!!!” قاللي ” أنا جيت لقيت ناس واقفة من 7:30, روح هات من مركز طلخا أو قسم ثانِ” المهم فكرت في نفس السؤال البديهي و قلت طيب,أنا هبتلكوا على باب القسم من باليل..قمت بدري تاني يوم عن اليوم إللي قبله و كنت في القسم عليى الساعة 7:45, فضلت مستني لحد مالراجل إياه جه على 8:45 قلت ميهمش..

“أنا عايز أعمل فيش أول بعد إذنك”..توقعت يقوللي “إستنى أفطر” مثلاً أو أي حاجة كدة..لقيته بيقوللي..”مفيش ورق فيش,لو عايز هات من مركز طلخا أو..” كملتله و قلتله “..أو قسم تانِ” و سيبته و وقفت تاكسي “مركز طلخا” قاللي ماشي و روحنا..جيت أديلو 5 جنيه قاللي “والله ما معايا فكة” قلتله “طيب إستناني هجيب ورقة فيش واجي و نروح قسم أول تاني”..قاللي ماشي..

طِلعت في الدور الثالث أو الرابع باين,
“سلامو عليكو”
“وعليكم السلام”
“لوسمحتوا عايز ورقة فيش”
“مفيش هنا والله,هات من قسم أول..”
“يا جماعة أنا جاي من قسم أول!!مفيش هناك..إزاي القسم ميبقاش فيه ورق فيش!!”
“يعني نعمل إيه؟ روح الأدلة الجنائية أكيد هتلاقي هناك..”
“أكيد؟!!”
“ممكن, بس في الغالب هتلاقي هناك”

نزلت للسواق..”ممكن نروح الأدلة الجنائية؟ أصل مفيش في القسم ورق فيش..” قاللي “طبعاً ماشي حضرتك, ده على شان الجيش؟” قلتله “آه”..أول لما إبتدينا نقرب من هناك, لقينا 2 قعدين في الشارع و قدامهم طربيزة و عليها ورق..سألهم السواق “مفيش ورقة فيش سلف” فواحد من إللي قعدين قاله تعالى..نزلتله..فلقيته بيقللي “الورقة بملوها ب 12 جنيه” مع العلم إنها بتتباع برة ب 4 جنيه باين..قلتله “ماشي بس ننجز” قام إللي جنبه قايللي “هات صورتك و صورة البطاقة” إديتهوملو و ملا الورقة و مشيت..كان السواق لسة مستني, ركبت و قلتله “على قسم أول بقه إنشاء الله”..

وإحنا ماشيين لقيته بيقوللي “أنا أول لما إتخرجت خلصت القصة دي كلها بورقة على شان أنا وحيد” جه في دماغي سؤال..”هو إنت خريج إيه؟” قاللي “بص هو أنا خريج هندسة عين شمس, قسم هندسة سيارات” – أنا يومها سمعتها طيران بس عامةً نكمل – قلتله طبعاً بتشتغلني قاللي “والله و معايا دبلومة من برلين كمان” قلت أكمل معاه..قلتله “و لما كدة بتشتغل على التاكسي ليه؟” قاللي “أنا هاحكيلك الحكاية, أنا كنت ماسك مدير تسويق و جودة في شركة عربيات كبيرة” – أنا مش هقول إسمها على شان لو كان بيفشر, بس هي شركة كبيرة و السلام..”و لما والدي مات, جالي إنفصال في الشبكية..و مشوني من الشركة لما لقو عيني إبتدت تجيب جاز..رفعت عليهم قضية و قلت على بال ما تخلص أتعالج..سألت عن العملية عرفت إن نسبة نجاحها في مصر مش كويسة و لازم تتعمل في ألمانيا..بعت جواب لمسئول كبير على أساس أتعلج على حساب الدولة مع العلم إن والدي كان مستشار في مجلس الدولة..رد عليا بجواب مضمنه إني مالآخر مش سعاد حسني..حجزت في مستشفى إسمها المغربي..بس مقولكش, النرسات هناك لو عزت يدلكولك أي حاجة بيدلكوهالك.. و عملت العملية و في الآخر خرجت وأنا دافع 16 ألف جنيه..و قلت على بال مالعلاج يخلص أشوف أي شغلانة أشتغلها ولّا البنتين يموتو مالجوع؟ و اهو أنا عايش دور التاكساجي..”

قلتله “تاكساجي إيه بقى يا راجل..” ساعتها كنا وصلنا إديتلو 10 جنيه و كان معاه جنيه و نص خدتهم و نزلت..دخلت القسم لقيت الراجل إياه لسة جايب ورق الفيش ..قلتله مش “ده ورق الفيش” قاللي “آه لسة جاي أهو”.. قلتله “طبيعي” و خلصت و مشيت بعد ما بصت..

..or you may would like to check other posts that can be useful..

1. CAT Scope8 story..
2. 7alim-02 (The Story)